મેરાન્યૂઝ નેટવર્ક. સુરતઃ સુરત નજીક પર્યટન સ્થળ તરીકે જાણીતા ગલતેશ્વર મહાદેવના મંદિરે ઉનાળુ વેકેશનના કારણે પર્યટકોની સંખ્યા વધુ રહે છે. તેવા સમયે તકનો ગેરલાભ લઈ ત્યાં તાપી નદીમાં સ્નાન કરવા જતી વખતે કિનારા પર  રાખેલા મોબાઈલ ફોન અને રોકડ રકમ ચોરતી એક ટોળકી પણ સક્રિય બની હતી. બુધવારે સાંજે બનેલી ઘટનામાં સુરતના યુવાનોના 8 મોબાઈલ ફોન અને રોકડા રૂ.10 હજાર ભરેલું પર્સ ચોરાયું હતું. યુવાનોએ સીસીટીવી કેમેરા અને મોબાઈલ ફોનની ઘંટડીના આધારે બે ચોરને પકડી પાડ્યા હતા. જે બન્નેનું મૂંડન કરાવી કામરેજ પોલીસને સોંપી દીધા હતા.

સુરતના આઠ-દસ યુવાનો બુધવારે ગલતેશ્વર ફરવા ગયા હતા. જ્યાં મંદિર દર્શન કર્યા બાદ તમામ તાપી નદીમાં સ્નાન કરવા ગયા તે વખતે 8 મોબાઈલ, રોકડા રૂ. 10 હજાર તેમજ પાનકાર્ડ, આધારકાર્ડ વગેરે એક પર્સમાં મૂકી એ પર્સ તાપીના કિનારે મૂકી દીધું હતું. જ્યારે આ તમામ સ્નાન કરીને બહાર નીકળ્યા ત્યારે ખ્યાલ આવ્યો કે પર્સની ચોરી થઈ ચૂકી છે. એ સાથે જ યુવાનોએ મંદિરના સીસીટીવી કેમેરા ચેક કરવાનું શરૂ કર્યું. જેમાં બે યુવાનો ચોરી કરતા હોવાનું જણાયું હતું. જેના આધારે આ યુવાનોએ ત્યાં પર્યટકોની ભીડ વચ્ચે આ બન્નેને શોધી કાઢવાનો પ્રયાસ કર્યો હતો. સાથોસાથ મોબાઇલ ફોનમાં રિંગ વગાડવાનું પણ ચાલુ રાખ્યું હતું. બન્યું એવું કે આ બન્ને તસ્કરોની નજીક યુવાનો પહોંચ્યા તે વખતે જ મોબાઇલ ફોનની ઘંટડી વાગી અને યુવાનોએ સાંભળી એ સાથે જ બન્નેને પકડી પાડ્યા હતા. જેની પાસેથી 8 મોબાઇલ તેમજ રોકડા રૂ. 8 હજાર મળી આવ્યા હતા. ગણતરીની મિનિટોમાં જ બન્ને તસ્કરોએ રોકડા રૂ. બે હજાર વાપરી નાખ્યા હતા અને આધારકાર્ડ-પાનકાર્ડ તોડીને કચરા પેટીમાં ફેંકી દીધા હતા. જે તૂટેલી હાલતમાં કચરાપેટીમાંથી મળી આવ્યા હતા.

બીજી બાજુ નજર સામેથી જ પર્સની ચોરી થઈ હોવાથી રોષે ભરાયેલા યુવાનોએ આ બાજુમાંથી વાળંદને બોલાવી બન્ને તસ્કરોનું મૂંડન કરાવ્યું હતું. ત્યાર બાદ કામરેજ પોલીસને હવાલે કર્યા હતા. જોકે, ત્યાં કોઈએ ફરિયાદ આપવાની તૈયારી ન દર્શાવતા પોલીસ પણ તસ્કર સામે પગલાં લેવામાં લાચાર થઈ ગઈ હતી.